激烈吤八字桥战斗（吴语嘉定闲话口述视频）

浏河长江

激烈吤八字桥战斗（吴语嘉定闲话口述视频）
嘉定革命烈士陵园·外冈游击队纪念馆
http://mp.weixin.qq.com/s?__biz= ... e=4#wechat_redirect


不晓得哪恁字幕朆做，故嘞吴语文本上传群文件。



激烈吤八字桥战斗

江南抗日义勇军撘外冈游击队准备垃嘉定地区打几个漂亮仗，以鼓舞淞沪一块人民群众吤抗日热情，扩大抗日民主根据地吤局面。
部队出发啧。昰趟出发吤队伍来得吤长，行军吤路程也来得吤长。部队像蜿蜒吤长龙，行进【土耷】蓬阆镇到娄塘镇吤大路上。从嘉定城边头擦过去，有能望着城里吤法华塔。【弍两】个战士道著要打嘉定城，但部队跑近著又离开啧。
八月三号拂晓（军事语体用词，不改用口语词），部队到达著八字桥西面。日头出来啧，大份战士全睏啧，只有放哨吤战士垃塱值勤。事务长嗫，领著炊事员到街上乡去买物事。
塱南双庙东南方向两里路吤澄桥，有一个地头蛇叫张锦帆。昰个人四十三岁，当过歇徐行镇警察分驻所吤巡官，是永胜乡吤董事兼伪自卫团吤团长。陈福祥垃嘉定城改编为嘉定县伪民众自卫团后，委任佢为三大队一中队长。昰个家伙平常脚塱乡里是坏事做尽。佢看见“江抗”吤炊事员垃街上乡买著巷巷尽尽吤菜，一打听又晓得吕炳奎吤部队到著柴塘北面，塱徐行镇西带面住著五六只宅头，马上派人到戬浜桥去向大队长樊士林报告。樊士林得着消息，要张锦帆亲自到嘉定城里去报告日军。
嘉定日军守备队闻讯，一头用电话通知驻南翔、太仓吤守备队前来接应，一头命令拿嘉定城吤东门撘北门全部关脱，单铤著一个班，分头把守西门、南门撘守备队吤大门；其余吤人马全部集中起来，准备出发。
上昼九点钟，日军开拔啧，由张锦帆领路，经过新泾桥、徐家行、周家桥，又沿著河滩边头、田岸上乡匍匐前进。十一点钟户荡，敌人爬到著南双庙。
昰日，“江抗”部队撘外冈游击队住垃【土耷】八字桥西面吤李陆管家村。昰个李陆管家村啊,像一个“品”字形：李家宅位于“品”字形吤东南角；管家宅垃塱“品”字形吤西南角上；“江抗”三路指挥部驻地陆家宅塱李家宅撘管家宅后头吤当中厢里。“江抗”五支队驻地垃管家宅，岗哨放垃【土耷】管家宅西北角上一只只有三五家人家吤小宅头西带边一个桥堍下头。乃么外冈游击队嗫，驻扎垃【土耷】李家宅。
昰个辰光，“江抗”部队撘外冈游击队已经休息著半日啧，正垃塱开饭。突然之间，五支队步哨线上打著一枪，【弍两】个战士马上饭碗放脱，枪一拿，投入战斗。
到达南双庙吤日军撘汉奸共总有几十个人。昰排家伙狡猾透狡猾透，佢【土耷】来吤辰光不走大路撘桥梁，捉著一只罱河泥吤木船，摆渡过河，绕过我伲五支队吤步哨线，直接插到著管家宅西北角吤伊只小宅上。等到我伲换哨吤战士发现，东洋鬼子已经到著宅上啧。敌人【辶\半】垃宅后头吤竹园里乡，不断吤用机枪撘掷弹筒对牢管家宅射击，子弹像雨点恁打过来。
驻扎垃管家宅吤“江抗”五支队听见岗哨上吤警报，冒著枪林弹雨，从管家宅上退出来。为著迷惑敌人，撤退前头，佢【土耷】拿几只军帽，挑垃竹头上乡，插垃个田岸边头，吸引东洋人吤注意力。乃么东洋鬼子嗫，企图掩护半个班从小宅后头吤解河泾摆渡，包抄五支队，但畀驻守垃李家宅吤外冈游击队用机枪封锁牢啧。
原来啊，西许战斗一打响，外冈游击队就垃副连长任增撘政治指导员蒋敏吤带领下（吕炳奎同志当时辰光塱“江抗”三路指挥部），进入到著宅前头吤黄草田里，准备投入战斗。蒋敏领一个班塱右带面擉出来吤户荡，任连副领一个班塱左带边后头五十公尺吤戳角上，文化教员祝德胜领一个班对徐家行方向警戒，预备队隐蔽垃李家宅塘南屋后头吤竹园里，由邱生凡同志率领。当发现东洋鬼子企图越过解河泾，包抄五支队吤辰光，佢【土耷】立即用机枪封锁牢著敌人吤去路。东洋鬼子吃着外冈游击队意外吤射击，连忙行主力勃身转来，用机枪撘掷弹筒吤火力，校准外冈游击队吤阵地轰击。
外冈游击队背靠“江抗”老大哥，坚定沉着吤战斗垃许，个个英勇无畏。塱突出部指挥作战吤三排长黄锡恩，对敌人满腔吤仇恨！佢看见敌人就塱眼门前，想冲过去捉活吤。但刚从牛车棚边头立起来就畀敌人吤机枪扫着，肩胛也射穿脱，手臂膊荡零零，两只脚已经不听指挥啧。但佢还是高喊：“同志们朝前冲啊！拿【弍两】个东洋鬼子杀光佢【土耷】！”机枪手徐德华，看见黄排长倒下来，连忙跑过去救护，但黄锡恩同志严厉吤对佢话：“侺豪【忄（灾\又）】打佷吤机枪，覅管我，当心畀东洋鬼子反冲锋！”徐德华只好奉命放脱黄排长，赶回机枪阵地上去。但还朆等佢跑到机枪许墪，敌人一个掷弹筒又打著过来，弹片削着佢吤大髈，雕脱著一大块肉，神经打断脱，路也呒能走啧。十四岁吤连部通讯员王仲英，一看见排长撘机枪手全身受重伤，连忙拿自家吤马枪背垃身上，爬过去拿机枪拖归来，交畀指导员。佢只大髈上乡也吃着著子弹，但佢忍牢定，用手搇牢伤口，独个子跑到竹园里去包扎。邱生凡同志领著短枪队员，拿一个个伤员、烈士，从枪林弹雨里抢救出来。
战斗中，任连副沉着吤指挥作战，塱失去机枪掩护吤辰光，佢用清脆吤嗓音高声喊道：“同志们！校准东洋鬼子！听我吤驳壳枪为号！我打一枪，佷【土耷】也统统打一枪。”几阵排枪，代替著机枪，拿东洋鬼子吤凶恶气焰压著下去。佢【土耷】掩护著蒋敏同志指挥吤一个班撤退，掩护著邱生凡同志抢救伤员任务吤完成。
昰歇儿头儿，南双庙吤东洋鬼子，又分著一路兵出来，经过柴塘、毛家宅，迂回到外冈游击队吤后头来啧。文化教员从近视眼镜里看得清清爽爽，佢连忙命令战士勃转身来射击。与此同时，东洋鬼子吤机枪撘步枪也从正面打到战士们匍匐吤坟地上来，子弹“【豁儿】【豁儿】【豁儿】【豁儿】”从【弍两】个战士身边飞过，射垃坟墩头上，烂泥石子“咇呖拔砳”溅起来。一歇儿工夫，独看见两熢白烟升起来，昰个是东洋鬼子吤信号弹，佢【土耷】垃塱互相招呼：“合围成功，胜利在望。”
正垃【土耷】外冈游击队处在两面受敌吤当口，突然之间，两阵暴雨恁吤机枪声，先后垃阵地两带边响起来，佢【土耷】几乎同时压牢著敌人吤嚣张气焰。
原来，当东洋鬼子集中火力攻击外冈游击队，同时又运动兵力企图包抄吤辰光，“江抗”指挥员老早看得煞喇打清垃许，佢【土耷】命令一连警戒毛家宅，三连出击管家宅。乃么朝毛家宅迂回吤东洋鬼子落到著一连吤火力网里。企图歼灭外冈游击队吤小宅上乡吤东洋鬼子，又落到著三连吤火力网里。三连政治指导员包厚昌同志，拿三挺机枪搁垃【土耷】管家宅三间【皀@囗】致吤瓦屋上，组成三角形吤交叉火力网。三连刘连长领著两个班，绕道八字桥，爬过两条小河，拦牢著东洋鬼子吤退路，准备捉俘虏。
日军本来当著管家宅方向已经呒啥事体，又看见著合围吤信号弹，嬽得呒哪恁。但就塱佢【土耷】嬽不煞吤辰光，三连搁垃管家宅屋顶上吤三挺机枪同时扫来，又是一场密集吤暴雨，一上趟就行脱著一个东洋小队长。乃么东洋鬼子晓得自家陷入著天罗地网，纷纷朝房子里乡撤退，悫张利用房屋，固守待援。但是，小宅上点房子极其简陋，单壁薄瓦，何塱经得起三挺机枪吤密集扫射？【弍两】个东洋鬼子死吤死，伤吤伤，单还铤剩少数几个受轻伤吤东洋兵还邋用步枪射击。不多歇儿，连当昰点还击吤枪声也稀零敞冷啧。【弍两】个汉奸一看大势已去，一个个全想滑脚脱。地头蛇张锦帆老早跑著不晓得何里。翻译急得呒逃逃处，结果话只骷郎头去钻垃个灶肚里乡。两个伪军么逼著叫跑不及吤老百姓拿衣裳脱垃佢【土耷】。
昰个辰光，“江抗”老早下令外冈游击队撤退。塱“江抗”一连、三连吤火力掩护下，【弍两】个外冈游击队吤指战员全部安全顺利吤撤出著李家宅。“江抗”指挥员立垃宅后头吤大路口，向撤退下来吤外冈游击队战士，含笑答头，搀搀手，拍拍肩胛，不断吤问候、鼓励：“佷【土耷】打得是好！”“头一趟面对面打东洋鬼子就打得昰恁出彩，真了不起！”
昰趟战斗，从上昼十一点钟，打到下昼三点半。小宅上吤东洋鬼子，打杀脱七个；重伤五个，其中东洋小队长一个；轻伤四个。两个伪军换著便衣想攉脱，结果畀我伲吤侦察员捉牢定。只有五个东洋兵撘一个翻译滑脚脱。塱毛家宅嗰滩，吃着我伲一连伏击吤东洋鬼子，死脱一个，伤脱两个。昰趟日伪军一塌刮喇子死伤廿一个人。第二坒赶来接应吤东洋鬼子，来得忒晏啧，还朆待佢【土耷】赶到，我伲吤部队就已经大踏步吤撤退啧。乃么佢【土耷】只好收集已经失去战斗力吤部队，重伤吤么用门板扛去，死脱吤么行麻袋装去。敌人成恐老百姓晓得，亲自动手打扫战场。回到城里之后，立即关闭城门，戒严三日。
战斗结束之后，宅上人家回转来，看见田岸上到块全是血印，场上秃是吤砖头落颗嘞瓦爿粒屑，屋顶开著巷巷尽尽吤天窗，壁脚上乡子弹洞是密密茻茻，蚊帐射得像破铤破【塌儿】吤捉鱼网，草席爿打得像糠筛，连当灶头镬子也射穿脱，汁水溚溚渧渧溜得一天世界。盘著盘损失，还少脱著五块门板。
我军塱战斗中牺牲六人，负伤九人。牺牲吤有外冈游击队三排排长黄锡恩同志。佢是上海下来吤印刷工人，中共候补党员。抗战爆发呒不几时，佢塱虹口吤屋里撘佢吤工作单位——商务印书馆，全畀东洋人摧毁脱啧。佢对日本鬼子有刻骨吤仇恨，作战勇敢透！“江抗”三连吤机枪手张小麻子，也塱昰趟战斗中牺牲。佢是武进北乡吤一个小裁缝，入伍还不到半年。牺牲前头佢还面向敌人，指头骨扣牢扳机。战斗结束之后，【弍两】个战友垃佢【土耷】身上盖著大幅吤红旗，迎著夕阳，抬到后方来。后方吤老公公老婆婆拿佢【土耷】自家吤棺材让出来，畀垃烈士来睏，安葬垃【土耷】娄塘附近。落葬前头，部队里举行著隆重吤追悼会。
当地居民塱战斗中也有五人伤亡。“小大爹”是塱抢救伤员吤辰光肩部中弹牺牲脱吤；“阿荣生”，大名李兆福，是替“江抗”领路牺牲脱吤；还有李阿六，佢话：“我活到乃四、五十岁，还朆看见歇中国人打东洋鬼子。”佢不听别人劝告，立垃门口头看打仗，结果脚髈上乡吃着流弹，也朆抢救过来。
八字桥战斗吤胜利，不多几时就传到著上海，《国际日报》特程特为派著新闻记者到敌后来采访“江抗”与外冈游击队吤指战员撘伤病员。
八字桥战斗，是嘉定人民抗战史上吤光辉一页。昰场英勇吤战斗，永远铭刻垃嘉定人民吤心里。抗战初期，嘉定一般吤游击队不敢撘日本人俦正面交锋，但“江抗”与外冈游击队却摆下阵势，一趟又一趟辣辣手手吤打击东洋鬼子，为嘉定人民吤抗日斗争增光添彩。
八字桥战斗以后，外冈游击队得到著交关锻炼撘提高，不多几时，外冈游击队正式改编为江南抗日义勇军第三路第三支队，吕炳奎同志任支队长，邱生凡同志留垃地方上搞党建撘建立政权吤工作。外冈游击队吤战士全部变成功著“江抗”吤战士，满足著佢【土耷】长远以来吤心愿！
从此以后，部队远到昆山西面、太仓北面去活动，大踏步吤前进，大踏步吤撤退。【弍两】个伤员嗫，全部留垃杨甸乡、邱家宅养伤。
日本人呒力大举报复，只有安亭吤鬼子来过歇一趟，到过歇邱家宅。昰日天，【弍两】个伤员有能跑吤就转移到边上吤宅头，呒能跑吤就塱地方工作人员撘人民群众吤帮助下，【辶\半】垃【土耷】豆田里、麦柴堆里，或者猪圈上头。东洋鬼子一个也朆寻着，单碰着著小通讯员王仲英。佢为此著塱房头里乡收捉，晏着一脚，等跑到场上，东洋鬼子已经到著宅坨里，呒掩掩处啧。但佢头子几许活络著嘞！豪【忄（灾/又）】要紧寻著只坑棚间钻进去假做佯头蹲坑。东洋鬼子跑过来朝佢认著认，嫌著臭嘞也朆跑近，单就问佢：“游击队大大的有？”王仲英听著横答头，乃么东洋鬼子就跑脱啧。


嘉定区革命烈士陵园  撰稿
疁•浏河长江  翻译並讲述
2016年3月23号  礼拜三
丙申年  二月半
嘉定建县  798周年



激烈吤八字桥战斗（吴语•嘉定话 译文+音频）

上
http://www.tudou.com/home/vlog/v ... 23&uname=htshzh

中
http://www.tudou.com/home/vlog/v ... 28&uname=htshzh

下
http://www.tudou.com/home/vlog/v ... 25&uname=htshzh

音频
http://www.tudou.com/programs/view/gU06rwMjHXw